نرخی نان گه‏ییشته سه‏دتمه‏ن ! له‏م چه‏ند رۆژەی دواییدا پاش لابردنی یارانه‏کان نرخی تاقه‏نانێک گه‏ییشته سه‏دتمه‏ن ،هه‏ڵبه‏ت له تاران له نێوان سه‏د تا سه‏دوپه‏نجا تمه‏ن له هات و چۆ دایه ،به واتایه‏ک نرخی نان چوار پێنج به‏رابه‏ر گرانتر بووە !! گران بوونی نان به شێوەی راسته‏وخۆ و ناراسته‏وخۆ کاریگه‏ری له سه‏ر ژیانی خه‏ڵک هه‏یه ، به تایبه‏تی ئێمه‏ی کڵۆڵ که له جێی مه‏مکه مژە بابۆڵه‏نانیان پێداوین و تا به ئه‏مرۆش نان به‏شێکی هه‏رە گرینگی خواردنی رۆژانه‏مان بووە !
گران بوونی نان کاریگه‏ری راسته‏وخۆی هه‏یه له سه‏ر بێکاری تاقمێک که سه‏رقاڵی کرین و فرۆشتنی ورکه‏نانن !! دیارە بژیوی رۆژانه‏ی ئه‏و تاقمه له رێگای کرین و فرۆشتنی قه‏راخی ئه‏و نانانه به‏دەست دەهات که له سایه‏ی سه‏ری هه‏رزانی نانه‏وە نه‏دەخوران ، به‏ڵام ئێستا به هۆی گران‏بوونی نان ناوەراست و قه‏راخی نان به‏ یه‏ک چاو سه‏یر دەکرێن و فه‏رق و جیاوازیان نیه !
له پاشان کاریگه‏ری ئه‏م گرانیه جگه له مرۆڤه‏کان ، بوونه‏وەرەکانی تریش ئه‏گرێته‏وە ! بۆ وێنه سه‏گی مه‏ڕی پتر له هه‏زاران ساڵه له کۆمه‏ڵگه‏ی ئێمه به نان و ورکه‏نانی شوان ژیانیان بردۆته سه‏ر و له دوای ئه‏م گران بوونه له‏وانه‏یه له داهاتوویه‏کی نزیکدا هه‏موو قڕیان بێ له برسان!  کورد گوته‏نی : ئه‏گه‏ر ناتخورێ بنی رانی ، چت داوە له نانی شوانی؟؟!
بۆ ئه‏وەی ئێمه‏ش نه‏که‏وینه به‏ر هێرشی ئه‏م قڕ بوونه ، پێشنیار ئه‏که‏م له‏مه به‏دوا له جێی سێ ژه‏م له رۆژدا ته‏نیا ژەمێک ته‏رخان که‏ین بۆ چێشت خواردن ، دە‏بێ واز له چێشت گه‏لی وەک هیلکه و رۆن ، هێلکه و ته‏ماته ، هێلکه و سوسیس و سه‏رجه‏م ئه‏و چێشتانه بێنین که پێویستیان به نانی زۆرە !هه‏ڵبه‏ت ئه‏م پێشنیارەم زیاتر بۆ کۆمه‏ڵه‏ی خوێندکاران و کارگه‏رانه!
له‏مه‏به‏دوا ئه‏وەی هه‏مانه و نیمانه ئه‏بێ بیدەین به نان ! ته‏نانه‏ت ئه‏بێ له جێی کتێب نان بکڕین !ترسی ئه‏وەم لێهاتووە به قۆناغێک بگه‏ین له جێی نان کتێب بخۆین !!
نازانم ! به‏ڵام خودا له سوڵتان مه‏حموود گه‏ورەترە !

+پاش شه‏ڕ و ململانێیه‏کی زۆر و هات و چۆیه‏کی بێ‏وچان بۆ ئیدارەی کار و باری خابگا ، ئاخری به‏رپرسی ئیدارە بریاری دەرکرد له مه‏ڕ به‏ ئه‏ندام بوونی من له یه‏کێ له وەتاغه‏کان ، به‏و مه‏رجه‏ی هه‏موو ئه‏ندامانی وەتاغ له سه‏ر وەرگرتنم یه‏کدەنگ بن !! پاش جێبه‏جێ کردنی هه‏موی ئه‏مانه ، له حاڵێکا کاغه‏زی واژۆ کراوی جه‏نابی ره‏عیسم!! پێ‏بوو ، سه‏ر خۆش سه‏رخۆش له‏و دەسکه‏وته مه‏زنه، ئه چووم که ناوم له کامپیۆتێرەکه‏دا تۆمار کرێ ، پێێان راگه‏یاندم تا له گه‏ڵ ئه‏و زانکۆیه‏ی پێشوو  "ته‏سویه حیساب" نه‏که‏ی ئیللان و بیللان ناوت ناچێته ناو کامپیۆتێرەکه !
ئه‏و جار به راستی هه‏ستم کرد زۆرم رق له ته‏کنه‏لۆژی و دەسکه‏وته‏ نوێیه‏کانی مرۆڤه ! تف له ته‏کنه‏لۆژی ، تف له مۆدێرنیته، تف، تف....‏!

+یه‏کێ له مامۆستاکانمان ، یه‏که‏م رۆژی کلاس پێێ راگه‏یاندین کارێکی لێکۆڵینه‏وەی هه‏ڵگرتۆته‏وە هی شارەداریه له سه‏ر کێشه و گرفته‏کانی شاری تاران ، هه‏ر کام له خوێندکارەکان یارمه‏تی بدەن ، بۆ هه‏ر پرسشنامه(پرسیارنامه) یه‏ک 7 هه‏زار تمه‏نیان دەداتێ ! دیارە گیرفانی پڕ له لایه‏ک و  زۆر بونی دەرسه‏کانم له لایه‏کی تر به‏هانه‏یه‏کی باش بوون بۆ نه‏چوونم ! به ڵام پاش چه‏ند حه‏فته له به‏ر هات و چۆ و نه‏وسنی خۆم گیرفانم وردە وردە خاڵی بۆوە و ناچار داوێنی مامۆستام گرت و کوتم بیکه به خاتری ئه‏و قورعانه کۆمه‏ڵێ له‏و پرسیارانه‏م دەیه بۆت پڕ که‏مه‏وە ! هه‏ر چۆنێک بوو به زۆر و زۆرداری کۆمه‏ڵێکم وەرگرت و کوتم پاش چه‏ند رۆژ پریان دەکه‏مه‏وە !
کاره‏که له هه‏موو گه‏ڕه‏که‏کانی تاران به‏رێوە دەچێ، دوو کۆمه‏ڵه پرسیارە که هه‏ر کام دە دوازدە لاپه‏ڕەن ،  ئه‏بێ بچی له‏و گه‏ڕەکانه‏ی بۆت دابین کراوە له زەنگی ماڵان دەی و جا ئه‏گه‏ر ئه‏و که‏سه زه‏حمه‏تی کێشا و ته‏شریفی هاته دەرێ ، کۆمه‏ڵه پرسیاری یه‏که‏م ئه‏بێ خۆت له گه‏ڵی پڕ که‏یه‏وە ، واته تۆ بیپرسی و ئه‏ویش وەڵامت بداته‏وە و ئینجا بینووسی ، پڕ کردنه‏وەی ئه‏و کۆمه‏ڵه پرسیارە لانیکه‏م 50 دەقه‏ی دەوێ ، له پاشان کۆمه‏ڵه پرسیاری دووهه‏می پێ ئه‏دەی و ئه‏ڵێی هه‏ر خۆشت ئه‏مه‏یان پڕ که‏وە و نیو سه‏عاتێکی تر بۆی دێم !!
جا له تاران به دەگمه‏ن هه‏ڵدەکه‏وێ برادەری تارانی هه‏ستێ هه‏ڵته‏ک هه‏ڵته‏ک بێته خوارێ ، ئه‏وە چیه ؟ وەڵامی پرسیاری جه‏نابت بداته‏وە !له پاشان هێندە که‏ر بێ سه‏عات و نیوێک له کاتی خۆی بۆ تۆ ته‏رخان کا ، ئه‏وە چیه ؟ وەڵامی پرسیاری جه‏نابت بداته‏وە !! یانی رەنگه له دە زەنگ ، هه‏ر تاقه‏زەنگێک وەڵامت بداته‏وە !! ئه‏مانه به‏شێكن له گرفته‏کان و کێشه‏کانی ئه‏م کارە ، به‏ڵام گیرفانی خاڵی ئه‏مه به گوێیدا ناچێ و هه‏ر وەک وتم ناچار چووم و داوێنی ئوستادم گرت !
به‏ڵام له به‏ر کێشه‏ی خابگا و بێ‏وەتاغی هه‏ر دەرفه‏تم نه‏بوو بڕۆم به شوێنیا و ته‏نیا ئێوارەیه‏ک دوو سێ سه‏عات چووم و دووانم پڕ کردەوە !! ئێستا ئه‏وی تری به سه‏ر دەستم دا ماوەته‏وە و  له به‏ر کار و باری ته‏سویه پێم ناکرێ پڕیان که‏مه‏وە !
ترسی ئه‏وەم که‏وتۆته دڵ دەڵێم پووڵ حاشا ، دەترسم نومرەشم نه‏داتێ ! کۆسه بۆ ریش چوو ، سمێڵیشی دانا !

+له‏و شه‏وانه‏دا چوومه مسته‏راح ، نوشتامه‏وە که هه‏ڵتروشکێم ، گوشی موبایله‏که‏م که له گیرفانی کراسه‏که‏م دابوو ، به‏ر‏بۆوە و یه‏کراست که‏وته ناو کونی مسته‏ڕاحه‏که !! نه گوشی هی خۆم بو نه سیم کارت !دەی چاری ناچاری نایلۆن فریزێرم له دەستم هاڵاند و هه‏تا ئانیشکم خسته کونی مسته‏ڕاحه‏وە که‏چی هه‏ر بۆم دەرنه‏هاته‏وە !! 
تف له مسته‏راحی سوننه‏تی، تف له سوننه‏ت ... تف تف... !

+ئه‏م ماوەیه ئینتێرنێکی وام له به‏ر دەست نه‏بوو بتوانم به جوانی بۆی هه‏ڵتروشکێم ! جار و بارە ده‏که‏وته به‏ردەستم ، ئه‏ویش هه‏ر به پێیه‏وە ! ئینتێرنێتیش وایه تا پیاو جوان بۆی هه‏ڵنه‏تروشکێ چێژی لێ نابا  ! بۆیه داوای لێبوردن له هه‏موو ئه‏و هاورێیانه دەکه‏م له‏م ماوەیه دا به سه‏ریان کردمه‏وە و نه‏متوانی به سه‏ریان که‏مه‏وه !

+بۆ ئه‏وەی جاڕز نه‏بن ئه‏و دمه‏ته‏قه شێعرییانه‏ی من و تاهیری رەشیدی له درێژه‏ی بابه‏ت‏دا بخوێننه‏وە !

مه‏ولانا جه‏ماڵه‏ددینی مه‏هابادی که دەستی ناڕوا وێبلاگێک بۆ خۆی بکاته‏وە ، جار و بارە له وێبلاگی پێشه‏نگ‏دا بابه‏تێک بڵاو دەکاته‏وە ! ماوەیه‏ک له‏مه‏و به‏ر شێعرێکی ته‏نزی بڵاو کردبۆوە له ژێر ناوی "لێم ببوورە گه‏ر که‏مێکیش ناحه‏زم !" .منیش له به‏شی بۆچوونه‏کاندا تاکه‏به‏یتێکم بۆ نووسی و ئه‏و تاکه به‏یته بووە هاندەری قه‏شمه‏رئاغا بۆ نووسینی وەڵامێکی قه‏شمه‏رییانه بۆ مەولانا جه‏ماله‏ددین ، پاشان به هه‏مان شێوە قه‏شمه‏ربانووش وەڵامێکی قه‏شمه‏رییانه‏ی داوە و له کۆتاییشدا منیش وەڵامێکم نووسی ! جا بۆیه دەڵێن قسه قسه دێنێ !
ئه‏و دەمه‏ته‏قانه سه‏رەتا له قه‏شمه‏رئاوا دا بڵاو بوونه‏وە و منیش دیسان لێرەدا دەیاننوسمه‏وە !با قسه‏ی خۆش ون نه‏بێ!

+بۆ خوێندنه‏وەی شێعرەکان بڕۆ درێژەی بابه‏ت !

زۆر جاران له گه‏ڵ رەفیقه‏کانم شه‏ڕم دەبو، زۆر زووش پێکه‏وە ئاشت دەبوینه‏وە .
جارێکی له گه‏ڵ هێمنی رەفیقم پێکه‏وە قسه‏مان نه‏دەکرد . به قه‏ولی منداڵانه خاک بووین . هێمن دایه‏گه‏ورەی تازە له حه‏ج هاتبۆوە ، ئه‏ویش به کورێکی رەفیقم دا لیوانێکی ئاوی زەمزه‏م بۆ ناردم . هه‏ر له به‏ر ئه‏وەش پێکه‏وە ئاشت بووینه‏وە . له گه‏ڵ هێمن چووین بۆ بازار ، ئه‏من دوسه‏دتمه‏نم پێبو که باجی له‏یلام پێی‏دابوم ، من ده‏مهه‏ویست کۆتر بکڕم . پێکه‏وە چوین بۆ قەپان*، پیاوێک مریشک و که‏ڵه‏باب وشتی وای دەفرۆشت .که‏ڵه‏بابێکی سپی چکۆله‏ی جوانی پێ‏بو دەیفرۆشت به سێ‏سه‏دتمه‏ن ! ئه‏من دوسه‏دتمه‏نم دانا و هێمنیش سه‏دتمه‏نی پێ‏بو که‏ڵه‏بابه‏که‏مان لێ کڕی !
دیوێکمان هه‏بوو له ژوورێ که فه‏رش و شتمان لێ‏رانه‏خه‏ستبوو ،هه‏ر له به‏ر ئه‏وه‏ش پێمان دەکوت دیوە چؤڵ! کاتێ که‏ڵه‏بابه‏که‏م هێناوە بردمه ئه‏و دیوە چۆڵه !
نزیکه‏ی سێ‏مانگ رامگرت . نێویشم نابوو "جوجو" ! دەمێک ئیسحال ببو ، یه‏ک دو دانه قورسم پێدا چاک بۆوە ! قاتڵی سه‏ری مێروله بوو ، له هه‏ر کوێ مێروله‏م دیتبایه زوو دەمبرد بۆ ئه‏وێ . هه‏ر کاتێ دەمکوت جوجو زوو دەهاته لام. زۆر شه‏وانیش نه‏دەهاته‏وە ، لێی تێک دەچوو بێته‏وە ماڵی خۆمان ! منیش تێر بۆی دەگه‏ڕام و تێر بۆی دەگریام ! به‏یانی دەماندیت بۆخۆی هاتۆته‏وە !
زۆر جارانی دەچووم له گه‏ڵ که‏ڵه‏بابه‏کانی به‏قه‏د خۆی به شه‏ڕم دەدا ! له بیرمه کاتی هه‏وەڵین شه‏ڕی ، که‏ڵه‏بابه‏که‏ی دیکه‏ی به‏زاند !
رۆژێک دیتم مریشکێک له کوچه‏که‏مانه ، کوتم با بێم تێبه‏ری دەم ! که‏ڵه‏بابه‏که‏م هێنا ، هێندێ به دەوری داهات ، له دواییدا مریشکه‏که فسی بۆ دەکرد نازانم فسی بۆ دەخوارد ،به ڵام که‏ڵه‏بابه‏که‏ی من سواری نەدەبوو ! نازانم پێی عه‏یب بو ، شه‏رمی دەکرد چی !
شه‏وێ له پاڵ یه‏کم کردن و پێکه‏وەم خه‏واندن ، بابه‏ک و به‏همه‏نی کرێنشینمان به‏یانیان زوو له خه‏و هه‏ڵدەستان ! به‏هه‏مه‏ن به‏یانی چوبو سه‏ری مریشکه‏که‏ی دابوو ، دیتبووی هێلکه‏ی کردووە ! منیش کوتم : ئه‏ها ، به شه‏رەفم که‏ڵه‏بابه‏که‏م کاری خۆی کرد ! به ڵام له لایه‏کیشه‏وە پێم ناخۆش بوو ، دەمکوت به‏همه‏ن ئه و هێلکه‏یه‏ی بۆچی هه‏ڵگرتووە ،خۆ من ئه‏و مریشکه‏م دیتۆته‏وە !
له دواییدا زانیمان ئه‏و مریشکه‏ش هی ماڵێکی کووچه‏که‏ی دیکه‏یه که هاتبوو بۆ کووچه‏ی ئێمه . کورەکه‏یان به به‏همه‏نی کوتبو ئه‏و مریشکه هه‏موو رۆژێ هێلکه‏یه‏ک دەکا !منیش زانیم که نا بابه گیان ، که‏ڵه‏بابی ئه‏من ئه‏هلی ئه‏و جۆرە قسانه نیه !
ماوەیه‏ک که‏ڵه‏بابه‏که‏م له کارێژه‏که‏مان راگرت ، شه‏وێک گوێم لێ‏بوو دەنگێک له کارێژه‏که‏مان هات ! کاتێ چوم دیتم که‏ڵه‏بابه‏که‏م عه‏لادینێکی عێراقیمان هه‏بوو ، له‏و سه‏رەوە به‏ریدابۆوە خوارێ و ته‏واوی نه‏فته‏کانی رشتبوو ! تماشای منی دەکرد، وای دەزانی لێی دەدەم ! ئه‏خر که‏ڵه‏بابه‏که‏م هه‏مو جارێ دەچووە سه‏ر شته‏کانی کاڕێژ و له‏و سه‏رە دەخه‏وت! به‏یانیانیش به قوقلی‏قوقو مێشکی سه‏ری دەبردین ! زۆر جارانیش نیوە شه‏وێ دەنگی دەهات!بابم هه‏مو جارێ دەیکوت ئه‏و که ڵه‏بابه بێ‏وەخته ، با سه‏ری ببڕینه‏وە !
ئاخریش به پێنج‏سه‏دتمه‏ن پێم فرۆشتنه‏وە ، ئه‏گه‏رچی گۆشتی مریشکم ئه‏و هه‏موو پێ‏خۆش بوو به‏ڵام دەمم له گۆشتی جوجو نه‏دا !
چوومه وەتاغێکه‏وە و تێری بۆ گریام !

*قە‏پان شوێنێکه له بۆکان مریشک و که‏ڵه‏شێر و کۆتر و که‏روێشک و بونه‏وەری سه‏ر ئه‏و عه‏رزه‏یان لێ‏دەفرۆشت !

"ئابرا"
شێتێک بوو چه‏ند ساڵ پێش ئه‏م رووداوە نیوە شه‏وێکی زستان له سه‏رما رەق هه‏ڵات!

ته‏واوی خه‏ڵکی بۆکان و ئه‏وانه‏ی له تیمارستانی بۆکان بوون ، به ساغ و نه‏خۆشه‏وە ئابرایان ئه‏ناسی !
ماوەیه‏کی زۆر نه‏بوو هێنابوویانه‏ ئه‏وێ ! ئه‏خر له کووچه و کۆڵانه‏کانی بۆکان وێڵ بوو ، زۆر جار مناڵه‏ورکه‏ی گه‏ڕەگێکی تێدەهاڵا و وەبه‏ر به‏ردە فڕکه‏یان ئەدا ! کاتێک هێنایانه تیمارستان هیچ که هه‏موو سه‏ر و گوێلاکی بریندار ببو ، برینێکی زۆر گه‏ورەش به قه‏درایی چوار قامک له سه‏ر پشتی بوو که قرماغه‏ی به‏ستبوو ! که‏س نه‏یدەزانی خه‏ڵکی کوێیه یا خۆ له کوێوە هاتووه ، به‏ڵام وه‏ک له نێوەکه‏ی ڕا دیار بو ، وێده‏چوو خەڵکی ناوچه‏ی ئه‏ردەڵان بێ ! لای سنه و دێگۆلان و ئه‏و دەوروبه‏رە !
ئابرا پیاوێکی کورته‏باڵای خڕیله بوو ،نێوچاوانی پان و سه‏ری پەڵه پەڵه و ئاسه‏واری برین به سه‏ر سه‏رییه‏وە دیار بوو ! سه‏ری گه‏ورەتر له سه‏ری مرۆڤێکی ئاسایی بوو ! دەسته‏کانیشی درێژتر ! کاتێک له سه‏ر پێ رادەوەستا دە‏ستی تا سه‏رچۆکی دەگه‏ییشت ! به‏ڵام لاقه‏کانی به شێوەیەکی سه‏رسورهێنه‏ر کورت بوون ! به چله‏ی هاوین و چله‏ی زستان کاپشێنێکی چڵکنی بۆری له به‏ردابوو له گه‏ڵ پاتۆڵێکی رەشی کۆنە و جووتێک که‏وشی جیر که خودا ئه‏زانێ چه‏ند وەخت بو نه‏شۆرابوون!  دەنگۆی ئه‏وە هه‏بوو ئابرا شه‏وانه له قه‏برستان ئه‏خه‏وێ و له‏گه‏ڵ مردووەکان قسه دەکا و زۆربەکای کاته‏کانیش دوو سێ جندۆکەی له گەڵه ! ...

ئه‏مشه‏و نازانم چۆن بوو ، بیرم هاته‏وە منیش ده‏فته‏رێکم هه‏بوو بیرەوەرییه‏کانم تێدا دەنووسییه‏وە !زۆر له‏مێژ بوو لێی بێخه‏به‏ر بووم ،ته‏نانه‏ت نه‏مده‏زانی له‏ کوێیه ! که‏لێن و قوژبنم هه‏مووی پشکنی و لە ئەنجامدا دیتمه‏وە!
پێشەکی دەفته‏رە‏که‏م ئاوا ده‏ست پێ دەکا :
"سپاس بۆ خوا که به کوردی دروست کردم"
راوەستن با له پێشه‏کی‏دا پێتان بڵێم چۆن بوو ئه‏و دەفته‏رەم دانا ؟
راستییە که‏یتان ده‏وێ من زۆر له مێژ بوو له فکری ده‏فته‏رێكی ئاوا دا بووم هه‏تاکو ئه‏وشتانه‏ی که له ژیانی من دا تاکو ئه‏لان رووی داوە له مێشکم نه‏چنه دەرێ.
هه‏ر بەم بۆنه‏‏یه‏ش ئه‏م دەفته‏رەم دانا.
1379/10/18

ئه‏م ده‏فته‏ره‏م هی ده ساڵ له‏مه‏وبه‏رە ، یانی کاتێک که هه‏مووی سێزده چواردە ساڵم تەمەن بوو ،بۆیە بە زمانێکی زۆر سادە و مناڵانە نووسراوە، هەموو بیرەوەرییەکانیش تا 12ساڵین ، ئیتر له دوای ئه‏و وازم لێ هێنا و پێموا گه‏ییشتم به‏و باوەرەی نووسینی بیرەوەری شتێکی قۆرە!نازانم! به‏ڵام ئه‏م ده‏فته‏رە ئەمشەو منی بردەوە سه‏ردەمی مناڵی و کووچەکەمان و گەڕەکەکەمان و رەفیقه‏کانم و .... زۆر شتی تر کە له بیرم کردبوون !
له‏مه‏و به دوا جار و بارە ئه‏گه‏ر نووسینم نه‏هات ،  بەشێكی کورت لە ده‏فته‏ری بیرەوەرییه‏کانم لە‏م مستەراحه‏دا بڵاو ده‏که‏مه‏وە !با له یادتان نه‏چێ ئێوە‏ش سه‏ردەمانێک مناڵ بوون، که‏واتە مناڵتان خۆش بوێ !

بیرەوەری 1 :
له ناو کورەکانی رەفیقمدا که‏متریان بۆ شه‏ره قسه ده‏رەقه‏تم دەهاتن . منیش هه‏موو جارێ به قسه‏ی قۆڕ و شێعری جنێو رقم هه‏ڵده‏ستاندن.
رۆژێک له گه‏ڵ یه‏کێک له ره‏فیقه‏کانم کردمه شه‏رە قسه . ئه‏و ره‏فیقه‏م نێوی - قادری ر - بوو، قادر سێ چوار ساڵ له من گه‏ورەتر بوو.
منیش ئه‏و رۆژه هه‏روا به قسه‏ و شێعر و ئه‏و جۆرە شتانه رقم هه‏ ڵستاند.
دوای دوو  سێ رۆژ هێندێ له ره‏فیقه‏کانم هاتن کوتیان به‏دبه‏خت قادر شێعری به سه‏ر دا هه‏ڵکوتوی !
منیش رقم هه‏ستا و چوومه‏وە ماڵێ و تا دەمتوانی شێعرم بۆ نووسی ، ئه‏ویش چ شێعرهایه‏ک . ته‏واو ببوم به شێخ رزای تاڵەبانی.
ته‏واوی کورەکانی کووچەی ئێمه و کووچەی قادر و ئه‏وان هه‏موو له جێگایه‏ک خڕ دەبوونه‏وە و منیش شێعرە‏کانی که بۆ قادرم نووسیبوو به‏رامبه‏ریان بۆم ده‏خوێندنه‏وە.قادریش بۆخۆی له وێ رادەوەستا و سوور سوور هه‏ڵدەگەڕا.
رۆژێکی چه‏ند شێعرێکم نووسیبو ده‏مهه‏ویست بیبه‏م بۆیان بخوێنمه‏وە، به‏ڵام ته‏نیا دوو سێ نه‏فه‏ر له ره‏فیقه‏کانم له‏وێ بون ، منیش دانیشتبووم بۆم ده‏خوێندنه‏وە له پڕ دا زانیم پیاوێکی پیر گوێی راگرتووە له شێعرەکانم. منیش هه‏ر دیتم تێم قولاند و هه‏ڵاتم . کوتی : ئه‏وە کوری کێیه ؟ ره‏فیقه‏کانم کوتیان ئه‏وە خه ڵکی گه‏ره‏کێکی دیکه‏یه !
کمۆدێکی سوورم هه‏بوو ، هه‏موو جارێ شێعرەکانم له‏وێ دەنا. رۆژێکی کاک جەماڵم چوبو کمۆدەکه‏م گه‏ڕابو شێعرەکانی منی خوێندبۆوە. له سه‏ر سفرە دانیشتبوین کوتی ئه‏و شێعرانه چیه نوسیوتن؟
منیش ده‏ستم کرد به گریان و کوتم ده‏ی جا خه‏تای قادرە ، ئه‏ویش شێعری له بارەی منه‏وە نووسیوە!
ئیدی وابو کاکه جه‏ماڵم ته‏واوی شێعرەکانمی دڕاند و جگه له یه‏ک دوو دانه‏یه‏کیان نه‏بێ هیچیانم له بیر نه‏ماوە که ئه‏وانیش ناوێرم له‏م دەفتەرەدا بیاننووسم...

"شێعرەکانم که جگه‏رگۆشی منن..."
تێبینی: ئەمڕۆ ژمارەیەکی حه‏وته‏نامه‏ی سیروانم دیته‏وە که هی ساڵی 83 بوو، کۆمەڵێک لە شیعرەکانی خۆم بینی ، هەر واق مام ! تەواو لە بیرم چووبۆوە نووسراوه‏ی له‏و جۆرەشم هه‏یه ! نالی گوتەنی :
شیعرەکانم کە جگەر گۆشی منن دەربه‏دەرن
دڵی نالی چ ره‏قه قه‏ت خه‏می فه‏رزەندی نیه !!

 وابزانم ئەو کات بە نییەتی شیعر نووسیومن و هەر بە نییەتی شیعریش ناردومن بۆ سیروان ! ئه‏وانیش هه‏ر به‏و نییه‏ته‏وە لە چاپیان داوە ! ئێستاش هه‏ر به‏و نییه‏ته‏وە دایانده‏نێم ! دڵ شه‏رته، باقییه‏که‏ی تڕەهاتە!

1
"فێڵ"
ئەگەر رۆژێ
وێنەکەمت لە شوێنێ دی
لە باتی من ماچی بکه!

2
"....!!"
من دانیشتووی شارێکی شێتم
حه‏ز دەکه‏م داشقه‏ی توورم کۆکه‏مه‏وە و
دەست دەمه داشقه‏یه‏کی تر
پڕ به کۆڵانی ئه‏م شارە هه‏را که‏م :
ورکه شیعر، ورکە چیرۆک، ورکە نان !!

3
"ژوان"
کە ئێوارێ هاتێ دەرێ
وەرە بۆ ئه‏م ناونیشانه:
www.avin....com

4
" ! "
دره‏نگانه و
له گه‏ڵ ته‏نیایی له باوەش یه‏ک داین

نا... نا...!
بیر لە دێمۆکراسی ناکه‏ینه‏وە!

5
"...؟"
ته‏نیا ئادەم و شه‏یتان و حه‏ووا بوون
که‏سی تر !
ئاده‏م مرد و ...
مانه‏وە شه‏یتان و حه‏ووا!

6
"...!!"
ئاخ خوایه...
بە درێژایی ئه‏م شه‏وگاره
ئه‏ستێرەکان داییسێنی!

خۆزگه‏م به خۆت!
هیچ پووڵی برقت بۆ نایه !!

7
...
کە لە پاش ماچ
گڕووم گرت بۆ مەمکت
تازه‏م زانی چه‏ند منداڵم !!

8
"سانسۆر"
....من........
..........تۆم..........
...خۆش..........
.............ناوێ....!!

9
" . "
بنووسن:
- ژی.... یان ...
- سی..... یا ... سه‏ت
- حه ‏... قی..... ‏قه‏ت
- ئازا...دی
- دێ....... مو...... کراسی
*
نوخته ، سەری خەت !!

تێبینی:ئەو شێعرانەی خوارەوە دەمەتەقەیەکی شێعرییە لە نێوان من و حەزرەتی کامیل دا ، کە سەرەتا لە وێبلاگی خەڵوەتخانە بەشی کامێنتەکان بڵاو بوونەوە ، بەڵام دوایە لە بەر کۆمەڵێ هۆکار "سەیید" خاوەنی خەڵوەتخانە بەشی کامێنتەکانی تەفر و توونا کرد.منیش بە دوو هۆ نەغد و پوخت لە مستەراحەکەم‏دا دەیاننوسمەوە :
یەکەم : هێند لەمێژ نیە مەلا بانگی بەیانی فەرمووه و من خەوم لێ زڕاوە و بە جارێ سەرم لێ ئەستوور بووە !
دووهەم : لەوانەیە ئەمڕۆ ئێوارێ بگەرێمەوە تاران ، هەڵبەت ئەگەر پووڵی گەرانەوەم دەست کەوێ، ئەی کوتم بەششەرە و هەزار ئیتتیفاق ! ئەوە هات و لەو رێ‏گایە دا تیا چووم و نەگەڕامەوە ! با قسەی خۆش ون نەبێ ! ها؟!

"هەینی 14ی جۆزەردانی 1389کاتژمێر: 2:55"
دەس و پەنجەم لە بۆ نووسین خومارە
سەرم ئاڵۆزە رووحم کۆڵەوارە

چرا خامۆشە خێزان گشتی خەوتوون
دەکا چاوم بە مانیتۆر شەوارە

...

"قالۆنچه‌ی ناو مسته‌راحه‌که‌ !"

 چیرۆکێک بۆ:

" ئه‌وانه‌ی وا ئه‌زانن دنیا فشه نیه !! "

 تێبینی : نووسراوه‌ی خواره‌وه به‌شێکه له ده‌سنووسه‌کانی "ج.ن" . ناوبراو خوێندکاری کۆمه‌ڵناسی بوو له تاران ، له گه‌ڕه‌کی ده‌روازه‌ده‌وڵه‌ت وه‌تاغێکی بچکۆلانه‌ی به کرێ گرتبوو . ئێستا له تیمارستانی ورمێ به‌سته‌رییه !!

---------------------------

سێ ساڵیش ده‌بێ ژه‌مێک به ته‌واوی تێرم نه‌خواردووه ، هه‌میشه‌ی خوا برسیمه ! شه‌و و رۆژ قۆڕه‌ی زگم دێ !! سه‌ره‌تا زۆر خه‌جاله‌تیم ئه‌کێشا به‌ڵام ئێستا بۆم شتێکی ئاساییه ، ته‌نانه‌ت هاوکه‌لاسییه‌کانیشم ئێستا پێکه‌نینیان پێی نایه !!

 *

عیشای خوا شک نابه‌م ! حه‌فته‌ی پێشوو له تاکسیدا کیفه‌که‌م لێ به‌جێ ما . سجیل و کارتی خوێندکاری و عابێر بانک و موبایل و ئه‌وه‌ی هه‌مبوو و نه‌مبوو له‌وێ دابوو !! ...

"نووسین باشتره له ..."

(1)
سه‏رتاسه‏ری حه‏فته‏ی پێشوو هه‏تا ئێستا حه‏زم کرد له ده‏رد و داخی حیزبایه‏تی چه‏په‏ڵی گه‏له چه‏وساوه‏که‏مان و خزمی خوێری و ئاشنای ئه‏حمه‏ق تێر تێر بڕشێمه‏وه...

(2)
حه‏فته‏ی پێشوو ئه‏وده‏مانه له تاران له ناو ئوتووبوسا بووم ، پیاوێکی به‏ته‏مه‏نیش سوار بوو ، ئه‏مجاره‏یان جێی خۆم به که‏س نه‏دا ، پیاوه‏که وا چاوی لێ‏ئه‏کردم ده‏تکوت پێی قه‏رزدارم، به‏ڵام من هه‏روا دانیشتم ، نازانم ! ره‏نگه ئه‏و پیاوه له به‏رچاوم زۆر گورج و گۆڵ هات ، له لایه‏کیشه‏وه هه‏ستم کرد خوی ئه‏و سه‏گبابانه‏م گرتووه ، هه‏ر چی بێ هه‏ڵنه‏ستام ...

(3)
دوێنێ نیوه‏ڕۆ براده‏رێک پاش نۆ مانگ زه‏نگی لێدا ، وتی هه‏‏رچی له نێوانمانا بووه له بیر خۆمم بردۆته‏وه ، ته‏نیا گه‏ره‏کمه شێعرێکت بۆ بخوێنمه‏وه که هاوینێ نووسیومه ، شێعره‏که‏ی خوێنده‏وه ، له میانه‏ی خوێندنه‏وه‏که‏ی ئه‏ودا له بڕێ شوێن بیرم لێ‏ئه‏کرده‏وه ئه‏گه‏ر پاش ئه‏وه‏ی شێعره‏که‏ی ته‏واو کرد و قسه‏ی درێژه دا چی پێ‏بڵێم ، ئه‏و شوێنانه‏ش که گوێم ئه‏دا شێعره‏که‏ی وا هه‏ستم کرد زۆر شێعری چاکه ، وا بزانم بۆ منی نووسیبوو !!!
شێعره‏که‏ی ته‏واو کرد
- خوا حافیز
- خواحافیز

(4)
دوێنێ شه‏و له گه‏ڵ دوو ره‏فیقم چاوم به دیمه‏نێک که‏وت و له ئه‏په‏ڕی تووره‏یی به گاڵته وتم : ...ێرم به‏و ژیانه !
له به‏رده‏م غه‏زاخۆرییه‏کی گه‏وره مناڵێک فالی حافزی ئه‏فرۆشت ، به لایا تێپه‏ڕین ، گه‏ڕامه‏وه و وتم :
- دونه‏ی چه‏نده؟
- 100 تومان
سێسه‏دتمه‏نم دایه و فالێکم هه‏ڵگرت ، ئه‏مه ش ده‏قی فاڵه‏که :

رو بر رهش نهادم و بر من گذر نکرد
صد لطف چشم داشتم و یک نظر نکرد

سیل سرشک ما ز دلش کین به در نبرد
در سنگ خاره قطره باران اثر نکرد

از روزگار بسیار عصبانی هستی، زیرا هرچه تلاش میکنی به جایی نمیرسی ،لذا احساس عجز و ناتوانی به تو دست داده است،ولی آخر دنیا که به پایان نرسیده است  و خوشبختی انسان مگر در یک چیز خلاصه شده است، به دنبال هنر ، دانش و دوستان تازه باش تا پیشاپیش خودت را کشف کنی
با خدا باش!!!

(5)
ئه‏م هه‏موو شێر و رێوی هێنانه‏وه‏یه ته‏نیا له به‏ر  یه‏ک قسه بوو:
نووسین ، باشتره له قه‏بز بوون !! جا حه‏ز ده‏کا فاڵێکی حافز بێ ، رووداوێکی قۆڕی ناو ئوتوبوس بێ ، بیره‏وه‏رییه‏کی قۆڕتری رابردوو بێ، هه‏رچی بێ نووسین باشتره له قه‏بز بوون !!

 شۆهره له هه‏ولێر کۆنسێرتێک ساز ده‏کات

رێنێسانس نیوز: گۆرانیبێژی ناسراوی فارس شۆهره سه‌لوه‌تی به‌نیازه له‌شاری هه‌ولێر كۆنسێرتێك ئه‌نجام بدات و له‌ئێستاوه ریكلام بۆ به‌ڕێوه‌چونی كۆنسێرته‌كه ده‌كرێت.

سه‌رچاوه‌یه‌ك به‌تایبه‌ت به‌رێنێسانس نیوزی راگه‌یاند كه‌بانگهێشتكردنی شۆهره بۆ ئه‌وه‌یه كه له‌ناو كورده‌كاندا ناسراوه و هه‌واداری زۆره. هه‌روه‌ها ئه‌وه‌شی وت كه هه‌ولێر به‌نیازه روی هونه‌رمه‌ندانی فارس له"‌دوبه‌ی"یه‌وه بۆ هه‌ولێر وه‌رسوڕێنێ و به‌م كاره‌ش په‌ره به‌گه‌شتیاری شاره‌كه بدات.

"شۆهره‏ش گه‏ییشته هه‏ولێر"

له تاران
بێزی نه‏هات ده‏م بنێ به په‏رداخی کوردێکه‏وه

له ئه‏نکارا
له خۆپێشاندانێکی جه‏ماوه‏ری‏دا
پاڵ به پاڵی گورگه‏کانی ئه‏تاتورک
ئه‏رۆییشت و
حاشای له هه‏بوونی کورد ئه‏کرد

له به‏غدا
پلانی ته‏قینه‏وه‏یه‏کی تری بۆ کورد ئه‏گێرا

له ده‌مشق
ناسنامه‏ی کوردێکی له‏ت و کوت کرد

ئێستا شۆهره
له هه‏ولێر ، له "شه‏قامی تاران" پیاسه ئه‏کا و
به گه‏مژه‏یی ئه‏م خه‏ڵکانه پێ‏ئه‏که‏نێ !

سه‏یری سه‏ر و ریشی چڵکن و
له شی ئه‏نجن ئه‏نجنی په‏یکه‏ره‏ی شه‏هیده‏کانی قه‏راخ شه‏قام ئه‏کا و
قا قا پێ‏ئه‏که‏نێ!

شۆهره ئێستا له هه‏ولێر
هه‏ر شه‏وه‏له باوه‏شی وه‏زیرێکا
ستیانه سووره‏که‏ی جێده‏هێڵێت
له ساته‏ دووزه‏خیه‏کانی ئۆرگاسمیشدا،به نینۆک،
له سه‏ر شان و پشتی وه‏زیره سه‏رخۆشه‏کان !
تابڵۆیه‏کی غه‏مگینی که‏لاوه‏کانی بابان و
وێنه‏یه‏کی ته‏ڵخی عومه‏ری خاوه‏ر ئه‏گێرێت و
قاقا پێ ئه‏که‏نێ
قا قا...

ئێسته شۆهره له هه‏ولێر
له شه‏قامی قه‏ره‏باڵغی شار
له گه‏ڵ خه‏ونه سه‏ربراوه‏کانی که‏رکووک و
ته‏نیاییه‏کانی هه‏ڵه‏بجه وێنه ئه‏گرێ و
 بۆ کوره سارد و سڕه‏کانی ئه‏وێ
ده‏م پان ئه‏کاته‏وه و
قاقا پێئه‏که‏نێ...

* داوای لێبوردن له قوباد جه‏لیزاده ئه‏‏که‏م !
شێعری حه‏بیبه‏ش گه‏ییشته سوێد به‏رهه‏می قوباد جه‏لیزاده لێره بخوێنه‏وه

 "حه‏کایه‏تی مسته‏ڕاحه‏که‏م"

ده‏گێرنه‏وه سوڵتان مه‏حموود و هه‏یاسی خاس...
نا حه‏کایه‏ته‏که ئاوا ده‏ست پێده‏کا:
ئه‏مه‏ قسه‏ی ئێستا نیه ، قسه‏ی چه‏ند مانگێک له‏مه‏وبه‏ره ، بێ‏پووڵی و بێ‏تاقه‏تی و له هه‏مووی خراپتر قه‏تحی موبایله‏که‏م تێکرا هروژمیان بۆ هێنابووم و نه‏مئه‏زانی په‏نا بۆ کێ و بۆ کوێ به‏رم ، به‏ڵێ هاتمه دنیا سه‏یر و سه‏مه‏ره‏که‏ی  ئه‏نته‏رنێت و له گۆشه‏یه‏کی ئه‏م جیهانه پان و به‏رینه‏دا مسته‏راحێکی بچکۆلانه‏م بۆ خۆم چێ کرد ، مسته‏راحێک که به ته‏نها هه‏ر هی خۆمه و به که‏یفی خۆم تێی ده‏فیرێنم...

مسته‏راح شوێنی حه‏سانه‏وه‏ی مرۆڤی ئه‏م سه‏رده‏مه‏یه ، چه‏ند ده‏قه‏یه‏ک ده‏رباز بوونه له ده‏ست ته‏نگ و چه‏ڵه‏مه‏کانی کۆمه‏ڵ‏گا و مرۆڤه خاسه‏کانی !!
جا که‏سی کاکی ، تۆش که سه‏ردانم ئه‏که‏ی به‏خێر بێی سه‏ر سه‏ر و سه‏رچاوان !! ره‏نگه ئێره به لاته‏وه سه‏یر بێ و له دڵی خۆت‏دا بڵێی : ته‏ککوو چه‏نده نائینسانه !! به‏ڵام نا کاکه!! خراپی لێ‏ حاڵی ! ئێره له گه‏ڵ هه‏موو ئه‏و مسته‏راحانه‏ی جه‏نابت گووت لێکردووه جیاوازه ، ئێره له‏وانه‏یه جار و بار هێنده به لاته‏وه شیرن بێ هه‏ر پێت خۆش نه‏بێ بڕۆی ، جاری واشه له به بۆگه‏ن خۆت ناگری !!
...
کاکه به پێیه‏وه نابێ ، هه‏ڵتروشکێ با قسه‏ت بۆ بکه‏م... !!